.لحظة ولادة عمر من دنيا العدم ـــــــــــــــــــــــــــــــــــــــــــــــــــــــــــــــــ لحظة كمال الحلم فى دنيا البراح
أصل الجراح
لا بد يوم وتلتئم
يا حلم كان فى الفضا تايه
وانا عصفور أدور
أجمع غناوى الصبر موالى
ليالى وانا مشتاق لعيونك
كان الطريق توهه
وجناحى م الطيران وقع ريشه
ولما تاه الريش والحلم غام
وانكسر منى الجناح
وبقيت ريشه فى مهب رياح
عملت سفينة وانا الربان
وتهت فى بحور الزمان
أشق الموج
دست القاع والشطين
وشفت عكار
ومداين بلا عنوان
وسفاين عليا تفوت
وانده عليكى ما سامع صوت
وراح الصوت
بين المتاهه والألم بصيت
صوتك كان يجلجل فى الميدان
على درب الزحام حطيت
وسط الميدان ورسيت
صوتك كان عنوانى
وكان الشط من تانى
سرسبت بوحى ونوحى وروحى
وسط الميدان
وشك بالأمل صابح
والحلم الاخضر عالوشوش طارح
ولقيتك صبية زى ما كنتى زمان
بتوزعى نورك على المظاليم
دا بحور هواكى ياما سبت عاشقين
كتبوا غناوى عشقهم
ماتوا ما داقوا عنب ولا تين
ولقيت عيونك بترسم سكتى
تفرش طريق الحلم قدامى
تغزل مداين فرح
وراح النوح
ولا عادلوش بذور ولا طرح
وحروف الحزن مشطوبة
وقلت السفر توبه
شديت حبالى
رميت الهلب على المرسى
وانا لسه
دموع الفرح فى عيونى
وقلت خلاص
عُدنا رفاقه
أنا والعمر نتلاقى
وأنا وانتى
وسط الميدان بنتقابل
غيطان وسنابل
حلم اترسم
لحظة مخاض
ملهاش ألم
لحظة ولادة عمر
من دنيا العدم
